En ce livret basty ces jours passez
Vous trouverez preceptes amassez,
Non de l’amour de ce bel Amadis
Qui l’a prisée autant qu’un paradis,
Non des beaulx faitz de la guerre presente
Qui à nos cueurs mille douleurs presente,
Mais seulement en ce bien petit livre
Voyez le train de fort longuement vivre
Et en Santé : œuvre certes requis
Autant, ou plus, qu’autres grands biens acquis,
Car que me vault amasser grand richesse
Et puis languir sus ma blanche vieillesse
Par maladie à faulte de secours
Que n’ay donné à mes beaulx premiers jours,
Que me vauldroit avoir les biens du monde
Si le mien corps n’est sain et pur et munde.
Brief je concludz par ce don presenté
Qu’il n’est richesse au monde que Santé.